Free Videos+PapersBuy Now Login Log Out

युवक व विद्यार्थ्यांच्या सर्वांगीण विकासाची कृतिशील चळवळ :

जगातील सर्वांत युवा देश म्हणून आपल्या देशाची ओळख आहे. ही युवाशक्ती देशविकासात मोलाची भूमिका बजावू शकते. डॉ. एपीजे अब्दुल कलाम यांनी पाहिलेले महासत्तेचे स्वप्न सत्यात उतरवायचे असेल तर या देशातील भावी पिढी अधिक सक्षम निर्माण व्हायला हवी. अंगभूत कलाकौशल्यांचा विकास करून बौद्धिक क्षमतेवर या पिढीने कर्तृत्वाचा ठसा उमटविणे आवश्यक आहे. भविष्यातील आव्हानांचा सामना करण्याची क्षमता त्यांच्याकडे असावी. हे सर्व काही शिक्षणपद्धतीवर अवलंबून आहे. तंत्रज्ञानाच्या युगात कालानुरूप शिक्षणाचे स्वरूप बदलले. त्याप्रमाणात विद्यार्थी-पालकांचा गोंधळही वाढला आहे. शिक्षण आणि करिअरबाबत विद्यार्थ्यांना पुरेशी माहिती मिळत नाही. म्हणूनच अनेक प्रतिभावान आणि हुशार विद्यार्थी विकासप्रवाहाच्या बाहेर फेकले जातात. ही सामाजिक समस्या लक्षात घेऊन स्वयम् सामाजिक संस्था आणि माय करिअरच्या माध्यमातून मी शैक्षणिक चळवळ सुरू केली आहे.

समाजात एकीकडे सोयीसुविधांची रेलचेल तर दुसरीकडे होतकरू आणि हुशार विद्यार्थी मूलभूत सुविधांपासून वंचित आहेत. हा मोठा विरोधाभास आहे. हल्ली ठरावीक अभ्यासक्रमांकडे विद्यार्थ्यांचा कल असतो. विद्यार्थी हे देशाचे भविष्य आहे. देशात दिवसेंदिवस शिक्षित बेरोजगारी वाढत आहे आणि दुसरीकडे अनेक क्षेत्रांमध्ये कुशल मनुष्यबळ मिळत नाही. चुकीच्या करिअर नियोजनाचा हा परिणाम होय. म्हणून स्पर्धेच्या युगात शिक्षणाच्या योग्य टप्प्यावर अचूक निर्णय घेणे आवश्यक आहे. ऑनलाईन मार्गदर्शनाच्या माध्यमातून विविध भरती परीक्षांची माहिती देऊन ही उणीव भरून काढण्याचा माय करिअरचा उद्देश आहे.

माय करिअर व स्वयम संस्थेचे उपक्रम :

शैक्षणिक क्षेत्र ज्या वेगाने बदलत आहे, त्या प्रमाणात विद्यार्थ्यांना अद्ययावत माहिती मिळत नाही. म्हणून शिक्षण क्षेत्रातील बदलते स्वरूप, उपलब्ध अभ्यासक्रम आणि रोजगार संधी याबाबत मार्गदर्शन करण्याच्या उद्देशाने माय करिअर व स्वयम् संस्थेतर्फे जिल्हा, तालुका आणि ग्रामस्तरावरील शाळा, हायस्कूल आणि महाविद्यालयांत करिअर मार्गदर्शन कार्यक्रम घेण्यात येतात.

माय करिअर व संस्थेचा उद्देश :

〉   रोजगारविश्वाची व्यापकता लक्षात घेता त्यानुसार रोजगाराभिमुख शिक्षण घेण्यासाठी युवक-युवतींमध्ये जागृती निर्माण करणे.
〉   बेरोजगारांसाठी कार्यशाळा आयोजित करून या अल्पमुदतीच्या तांत्रिक अभ्यासक्रमांची माहिती देणे.
〉   सुशिक्षित बेरोजगारांना स्वयंरोजगार प्रशिक्षण, विविध शासकीय योजना, कर्जयोजना, मार्केटिंग , विक्री आदींबाबत मार्गदर्शन करून स्वयंरोजगारासाठी प्रवृत्त करणे.
〉   तत्कालीन नोकरीभरतीबाबत मार्गदर्शनासाठी कार्यशाळा घेऊन यूपीएससी, एमपीएससी, बँकिंग, रेल्वे, एसएससी आदी क्षेत्रांतील भरती प्रक्रियेची सविस्तर माहिती देणे.
〉   कृषी आधारित उघुउद्योगांबाबत युवकांना मार्गदर्शन करणे.
〉   शालेय जीवनापासूनच करिअरचे नियोजन करावे. पाल्याची आवड आणि क्षमता लक्षात घेऊन करिअरचे क्षेत्र निवडावे, याकरिता करिअरच्या विविध पर्यायाबाबत जागरूकता वाढवून विद्यार्थी पालकांना करिअर मार्गदर्शन करणे.
〉   परीक्षाकाळातील विद्यार्थ्यांच्या मनावरील दडपण कमी करणे, अपेक्षित निकालाकरिता विद्यार्थ्यांनी परीक्षेकरिता पूर्वनियोजन करणे, मानसिक भीती दूर करून परीक्षेत उत्तम कामगिरी कशी करायची, याबाबत मार्गदर्शन.
〉   मुलांच्या बौद्धिक क्षमतेनुसारच अपेक्षा बाळगाव्या, पुस्तकी ज्ञानासह विद्यार्थ्यांच्या सर्वांगीण विकासावर भर द्यावा, परीक्षा आणि निकालाच्या काळात मुलांवर कोणतेही दडपण न देण्यासाठी पालकांना वचनबद्ध करणे.
〉   जिल्हास्थळासह तालुकास्तरावर तसेच दुर्गम भागातील शाळा-महाविद्यालयांमध्ये निःशुल्क शैक्षणिक मार्गदर्शन करणे.

Contact Info:

Postal Address:

VRG House, 19, Great Nag Road, Nagpur. 440009

Location Info:

Feedback:

error: Content is protected !!